Fráboðan D, 1. august 2006

 

Við heimild í § 2, stk. 2, §§ 7-11, §§ 14 og 15, stk. 2, § 18, stk. 2 og 3 og § 49, stk. 2 í løgtingslóg nr. 165 frá 21. december 2001 um trygd á sjónum, og við heimild frá avvarðandi landsstýrismanni verður ásett:

 

§ 1. Samsvarandi ásetingunum og avmarkingunum í kap. D I í fylgiskjali 1, er hendan Fráboðanin frá Skipaeftirlitinum galdandi fyri ferðamannaskip og skjóttgangandi ferðamannaskip (”High Speed Crafts”/”HSC”) í innanoyggja sigling uttan mun til, hvat flagg skipið siglir undir.

Stk. 2. Tær higartil galdandi reglurnar fyri ferðamannaskip og skjóttgangandi ferðamannaskip (HSC) í innanoyggja sigling eru tó framvegis galdandi fyri verandi skip uttan so, at annað verður ásett í hesum regluverki.

 

§ 2. Nærri teknisku ásetingarnar um byggikrøv og útgerð v.m finnast í niðanfyri nevnda fylgiskjali 1, sum endurgevurteknisku reglurnar í ”Meddelelser fra Søfartsstyrelsen D”, umframt fylgiskjal 2, sum eru serføroyskar reglur viðvíkjandi glasfipur:

Fylgiskjal 1:

(omanfyri nevndu fylgiskjøl verða eisini útgivin í pappírsformi (hefti) av Iver C. Weilbach & Co A/S, Toldbogade 35, DK-1253 København K, undir heitinum "Meddelelser fra Søfartsstyrelsen D")

 

§ 3. Ásetingarnar ífylgiskjali 1 skulu lesast, skiljast og tulkast við atliti til hesar broytingar og tillagingar til føroysk viðurskifti:

 

Stk. 1  Generelt fyri alt regluverkið:

1)      Allastaðni, har ”Søfartsstyrelsen” ella annar danskur myndugleiki er nevndur í hesum regluverki, skal  - tá ræður um føroyskt myndugleikaøki  - skiljast ”Skipaeftirlitið” ella møguliga annar avvarðandi føroyskur myndugleiki

2)      Allastaðni, har orðingar sum ”Danmark”/”dansk”, ”Grønland”/”grønlandsk” ella ”dansk skib”/”grønlandsk skib” verða nýttar í hesum regluverki, skal skiljast ”Føroyar/føroyskt” ella ”føroyskt skip” uttan so, at ásetingarnar viðvíkjandi viðurskiftum uttan fyri føroyskt myndugleikaøki

3)      Tá Føroyar ikki er limur í EU, eru ásetingar í regluverkinum viðvíkjandi rættindum og skyldum hjá einum EU-limalandi mótvegis einum øðrum EU-limalandi, ella mótvegis einum EU-myndugleika ikki galdandi fyri Føroyar. Teknisku krøvini í EU-reglunum (direktivum v.m.) eru tó galdandi fyri føroyskt skip, fevnd av hesum regluverki.

4)      Skipaeftirlitið kann – antin generelt, ella í tí einstaka førinum - víkja frá teimum í hesum regluverki nevndu tíðarfreistunum fyri uppfyllan av krøvunum, um tað ikki stríðir ímóti skyldum Føroya sambært altjóða konventiónum, og annars bara, um tað verður mett neyðugt, rímiligt og ráðiligt við atliti til trygdina á sjónum

5)      Generelt skal alt regluverkið lesast og skiljast við atliti til føroysk skip, føroysk viðurskifti og føroyskt myndugleikaøki.

6)      Tær til eina og hvørja tíð galdandi vegleiðingarnar frá Søfartsstyrelsen sum knýta seg til hetta regluverkið, verða við neyðugum tillagingum eisini nýttar av Skipaeftirlitinum. 

 

Stk. 2.  Serstakar broytingar í Kapitul D I:

1)      Ferðamannaskip, sum verða innflutt til Føroya, verða viðgjørd sum ”nyt skib” jb. kap. D I, regel 2.8

2)      Ásetingarnar í kap. D I, regel 3, dagfest 1. november 2004 í pappírsútgávuni av Meddelelser D og á regluportalinum hjá Søfartsstyrelsen: ”Klasser af passagerskibe i danske og grønlandske farvande” eru ikki galdandi í Føroyum. Í staðin verða serligu ásetingarnar um føroysku havøkini við tilhoyrandi korti sett inn sum regla 3 í kap. D I í hesi Fráboðan frá Skipaeftirlitinum.  

3)      Krøvini í kap. I, regel 4.1.6 og 4.3.2 um stál- ella líknandi konstruktión, eru í føroyska regluverkinum bert galdandi fyri ferðamannaskip sum eru 15 metrar ella longri.

Ferðamannaskip undir 15 metrar, kunnu verða bygd úr glasfipur, og skulu tey tá – umframt krøvini í hesum regluverki, sum galda fyri ferðamannskip uttan mun til hvørjum tilfari tey eru bygd úr - harumframt eisini lúka tey konstruktivu krøvini um tilfar og bygging av glasfipurførum samsvarandi krøvunum hjá einum góðkendum klassafelagi, tó í minsta lagi sambært krøvunum í Nordisk Båt Standard for Yrkesbåter 1990 og tað í fylgiskjali 2 til hesa fráboðan galdandi ískoyti, dagfest 1. august 2006.

Glasfipurfør undir 15 metrar, sum áðrenn 1. august 2006eru góðkend sum ferðamannaskip, kunnu av Skipaeftirlitinum heilt ella lutvíst verða frítikin frá krøvum í hesum regluverki, og í staðin framhaldandi verða góðkend sum ferðamannaskip eftir teimum reglum, sum tey higartil hava verið góðkend eftir.

 

Stk. 3.  Tillagingar av ymiskum tíðarfreistum

 

      Við fyrivarni fyri skyldum Føroya sambært altjóða konventiónum, og við fyrivarni fyri EU-reglum sum seta krøv til triðjalandsskip, verða dagfestingarnar/tíðarfreistirnar í fylgiskjali 1 broyttar og tillagaðar soleiðis:

 

1)                  ”1. januar 2003” verður generelt broytt til 1. januar 2007

2)                  Í kap. II-1, Afsnit C, regel 1 verður ”1. juli 2002” broytt til 1. januar 2007

3)                  Í kap. II-1, Afsnit D, regel 3.7 verður ”1. juli 2002” broytt til 1. januar  2007

4)                  Í kap. II-2, Afsnit A, regel 6.9 verður ”1. oktober 2005” broytt til 1. januar 2010

5)                  Í kap. II-2, Afsnit A, regel 10.2.16 verður ”1. juli 2003” broytt til 1. juli 2007

6)                  Í kap. II-3, afsnit III, regel 28 verður ”1. oktober 2004” broytt til 1. januar 2007

7)                  Í kap. III, regel 5-1, pkt. 1 verður ”1. januar 2006” broytt til 1. januar 2010

8)                  Í kap. IV, regel 1, pkt. 1 verður ”1. februar 2003” broytt til 1. februar 2007

9)                  Í kap. V, regel 17, 18 og 19 verður ”1. juli 2002” broytt til 1. januar 2007

10)              Í kap. V, regel 19, stk. 2, pkt. 2.4.3 verður ”1. juli 2003” broytt til 1. juli 2007

11)              Í kap. V, regel 20, pkt. 1.3 verður ”1. januar 2004” broytt til 1. januar 2009   

12)              Í kap. XXIV, Part 2, regel 4, pkt. 1.1 verður ”1. januar 2005” broytt til 1. januar 2007

 

Stk. 4. Lógargrundarlagið fyri verandi (eksisterende) ferðamannaskip í innanoyggja sigling

 

Í tann mun, eitt ferðamananskip í innanoyggja sigling skal viðgerast eftir tekniskum reglum, sum vóru galdandi frammanundan hesi fráboðan frá Skipaeftirlitinum D, skal avvarðandi lóggávan, sum var galdandi her á landi fram til 1. januar 2002 nýtast. Tær broytingar og dagføringar av Meddelelser D frá Søfartsstyrelsen sum eru framdar í tíðarskeiðnum frá 1. januar 2002 og til hendan Fráboðan frá Skipaeftirlitinum D nú verður lýst við gildi frá 1. august 2006, eru ongantíð settar í gildi í Føroyum, og hava tí ongantíð verið partur av galdandi rætti í Føroyum. 

 

§ 4. Eitt eintak av hesum regluverki skal altíð verða umborð á skipum 15 metrar og longri, sum eru fevnd av regluverkinum.

 

§ 5. Brot á reglurnar í hesi fráboðan verða revsað við bót ella fongsul upp til 1 ár.

Stk. 2.Revsingin kann økjast til fongsul upp til 2 ár, um

1)     brotið hevur havt við sær skaða á lív ella heilsu, ella ført til vanda fyri hesum,

2)     tað áður eru givin boð ella forboð viðvíkjandi somu ella líknandi viðurskiftum, ella

3)     brotið hevur havt við sær fíggjarligan vinning, ella ætlaðan fíggjarligan vinning, fyri ein sjálvan ella onnur.

Stk. 3.  Umstøðurnar verða mettar serliga tyngjandi, um tað er hendur skaði, ella vandi fyri skaða, á lív ella heilsu hjá ungum undir 18 ár, sb. stk. 2, nr. 1.

Stk. 4.Verður hald ikki er lagt á vinningin, ið er fingin við at bróta reglurnar, verður støddin á bótini, undir hesum ískoytisbót, ásett við serligum atliti til støddina á tí fíggjarliga vinninginum ella ætlaða fíggjarliga vinninginum av lógarbrotinum.

Stk. 5.Feløg v.m. (løgfrøðiligir persónar) kunnu áleggjast revsiábyrgd eftir reglunum í føroysku revislógini.

 

§ 6. Hendan fráboðanin frá Skipaeftirlitinum kemur í gildi tann 1. august 2006

 

Skipaeftirlitið, tann 1. juli 2006

 

Óli Hans Hammer Olsen, deildarstjóri

                                                                                                                                                                                                       

                                                                                                                      / Petur E. Nielsen, ráðgevi

 

 

Høvuðsinnihaldið í dagføringini

 

Í mun til tað í Føroyum seinast lýsta regluverkið fyri ferðamannaskip í innanoyggja sigling (Søfartsstyrelsens tekniske forskrift D af 23. marts 2000), er høvuðsinnihaldið í hesi dagføring:

 

• Influtt ferðamannaskip verða viðgjørd sum nýggj ferðamannaskip (serføroyskar reglur)
• Ferðamannskip undir 15 metrar, sum eru bygd úr glasfipur (GRP) verða framyvir fevnd av teknisku krøvunum í Meddelelse D frá Søfartsstyrelsen (serføroyskar reglur)
• GMDSS umborð á verandi ferðamannskip undir 24 metrar til longdar
• Bjargingarútgerð umborð á verandi ferðamannaskip
• Flutningur av góðsi við ferðamannaskipum
• AIS (“Automatic Identification System”) og VDR (“svarti kassin”)
• Serlig stabiliteskrøv til ávís ro-ro ferðamannaskip (“Stockholm-avtalan”)
• Kloakkspillivatn (Marpol, annex IV)
• Burturkast frá skipum (Marpol, annex V)
• Luftdálking frá skipum (Marpol, annex VI)
• Certifikatir (loyvisbrøv)

 

Viðmerkjast skal, at omanfyri nevndu broytingar eru framdar í altjóða og danska regluverkinum í tíðarskeiðnum 2002-2005. Tá galdandi føroyska regluverkið fyri ferðamannaskip í innanoyggja sigling er frá tíðini upp til 2002, og dagføringin, sum nú verður lýst, er samsvarandi nýggjasta Meddelelse D frá mai 2005, er eitt “glopp” í tíðarskeiðnum frá 2002 til 2005 sum ongantíð er sett í gildi í Føroyum. Hetta “gloppið” má havast í huga, tá finnast skal fram til galdandi regluverk fyri verandi ferðamannaskip í innanoyggja sigling. 

 

Frágreiðing um regluverkið fyri ferðamannaskip í innanoyggja sigling

 

Tekniska regluverkið fyri ferðamannaskip í innanoyggja sigling er sett saman av einari ”Fráboðan frá Skipaeftirlitinum D”, umframt 2 fylgiskjølum (bilag).

“Fráboðan frá Skipaeftirlitinum D” – ið kann sammetast við eina vanliga kunngerð - inniheldur heimildargrundarlagið, gildisøki, tillagingar til føroysk viðurskifti, revsiásetingar og gildiskomureglur.

Tey bæði fylgiskjølini innihalda teknisku reglurnar um konstruktión og útgerð v.m. til ferðamannaskip í innanoyggja sigling. Reglurnar í fylgiskjali 1 eru einsljóðandi við fylgiskjølini til ”Søfartsstyrelsens tekniske forskrift D af 1. maj 2005” sum eisini verða givin út í pappírsformi (hefti skipað í ringbind - “Meddelelser D”).

Fylgiskjal 2 inniheldur serføroysk ískoytiskrøv til ferðamannaskip undir 15 metrar, sum eru bygd úr glasfipur (GRP).

Framtíðar dagføringar, broytingar og tillagingar av teknisku krøvunum í fylgiskjølunum verða settar í gildi í Føroyum við einari nýggjari ”Fráboðan frá Skipaeftirlitinum D” sum verður lýst á reglu-portalinum á heimasíðuni hjá Skipaeftirlitinum www.fma.fo.

 

Gildisøki

Samsvarandi ásetingunum og avmarkingunum í kap. I, er hetta regluverkið galdandi fyri ferðamannaskip og skjóttgangandi ferðamannaskip (”High Speed Crafts”/”HSC”) í innanoyggja sigling uttan mun til, hvat flagg skipið siglir undir.

Eitt ”ferðamannaskip” er eitt skip, sum siglir við meira enn 12 ferðandi – manningin og børn undir 1 ár ikki íroknað jb. kap. I, regel 2.5.

Eitt skjóttgangandi ferðamannaskip (”High Speed Craft”/”HSC”/”Højhastighedspassagerskib”) er eitt skip, sum siglir við meira enn 12 ferðandi – manning og børn undir 1 ár ikki íroknað, og sum kemur undir ásetingarnar í kap. X, reglu 1 í SOLAS 1974.

Ferðamannaskip í innanoyggja sigling í havøkjunum B, C og D verða tó ikki roknaði sum HSC, um deplacement við konstruktiónsvatnlinjuna er minni enn 500 m³ og mesta ferðin – roknað sambært pkt. 1.4.30 í HSC-koduni – er minni enn 20 míl.

 

Regluverkið er ikki galdandi fyri ferðamannaskip, sum eru:

• krígsskip ella troppatransportskip
• skip, hvørs framdrift ikki er mekanisk
• primitivt konstrueraði træskip
• upprunalig og kopieraði søgulig ferðamannaskip, konstruerað áðrenn 1965 og í høvuðsheitum bygd úr uppruna tilfarinum
• stuttleikafør (”fritidsfartøjer”) uttan so, at tey eru ella verða mannaði, og við vinnuligum  endamáli sigla við meira enn 12 ferðandi
• skip, sum bara sigla í havnaøkjum (”havneområde”) jb. kap. I, regel 2.19

 

Regluverkið er heldur ikki galdandi fyri hesi skjóttgangandi ferðamannaskip (”HSC”):

• krígsskip ella troppatransportskip
• stuttleikafør (”fritidsfartøjer”) uttan so, at tey eru ella verða mannaði og við vinnuligum  endamáli sigla við meira enn 12 ferðandi
• skip, sum bara sigla í havnaøkjum (”havneområder”) jb. kap. I, regel 2.19

 

Regluverkið er galdandi fyri nýggj skip (jb. kap. I, regel 2.8) uttan so, at annað verður ásett í einstøku reglunum. Verandi skip (”eksisterende skib”, jb kap. I, regel 2.9) skulu lúka higartil galdandi reglurnar uttan so, at annað verður ásett í einstøku kapitlunum/greinunum (§ 1, stk. 2 í sjálvari Fráboðanini frá Skipaeftirlitinum D).

Higartil galdandi regluverkið fyri ferðamananskip í innanoyggja sigling (Meddelelse D) hevur ikki fevnt um ferðamannaskip, sum eru bygd úr glasfipur (GRP). Verandi ferðamannaskip, sum eru bygd úr glasfipur, hava tí higartil verið góðkend eftir regluverkinum fyri smærri vinnufør undir 15 metrar (Meddelelser F) umframt glasfipur-krøvunum í Nordisk Båt Standard for Yrkesbåter (1990).

Frá gildiskomudegnum 1. august 2006, verða ferðamannaskip undir 15 metrar, sum eru bygd úr glasfipur, fevnd av hesi Fráboðan frá Skipaeftirlitinum D. Fyri at taka neyðug atlit til tey glasfipurfør undir 15 metrar, sum longu eru góðkend sum ferðamannaskip, kann Skipaeftirlitið tó heilt ella lutvíst frítaka hesi før frá krøvunum í hesi Fráboðan, og í staðin framhaldandi góðkenna tey eftir teimum reglum, sum tey upprunaliga vórðu góðkend eftir. 

Hesar broytingar og tillagingar í mun til higartil galdandi reglur eru nevndar í § 3 í Fráboðanini frá Skipaeftirlitinum, har eisini aðrar generellar tillagingar til føroysk viðurskifti verða gjørdar í fylgiskjølunum (teknisku krøvini í ”heftunum”).

Nevndu broytingar og tillagingar mugu havast í huga, tá regluverkið verður nýtt í føroyskum høpi.   

 

Heimildargrundarlagið

Heimildargrundarlagið fyri hesi Fráboðan frá Skipaeftirlitinum er løgtingslóg nr. 165 frá 21. december 2001 um trygd á sjónum.

Teknisku reglurnar fyri ferðamannaskip í innanoyggja sigling byggja annars á altjóða reglur (IMO og ILO konventiónir) umframt EU-ásetingar:

Ásetingarnar í kapitlunum I, II-1, II-2 og III stava frá ”bilag 1 til EU-direktiv 98/18/EF om sikkerhedsregler og – standarder i passagerskibe”, sum broytt við EU-direktivi 2002/25/EF, umframt EU-direktivunum 2002/84/EF, 2003/24/EF og 2003/75/EF.

Ásetingarnar í kapitul II-3 stava frá ILO-konventión nr. 92 frá 18. juni 1949 og ILO-konventión nr. 133 frá 30. oktober 1970 viðvíkjandi uppihaldsrúmum hjá manningini umborð á skipum, umframt EU-direktivi 2003/24/EF.   

Ásetingarnar í kapitul II-5 stava frá EU-direktivi 98/18/EF, umframt altjóða konventiónini um lastalinjur frá 5. apríl 1966 og tilhoyrandi protokol frá 1988.

Ásetingarnar í kapitlunum IV til VI stava frá EU-direktivi 98/18/EF, sum broytt við EU-direktivi 2002/84/EF, umframt altjóða konventiónini um trygd fyri mannalív á sjónum (SOLAS 1974) við seinni broytinum og tilhoyrandi protokollum.

Ásetingarnar í kapitlunum VII til IX stava frá SOLAS 1974 við seinni broytingum og tilhoyrandi protokollum.

Ásetingarnar í kapitul XXI, XXIII, XXIV, XXV og XXVI stava frá bilag I, III, IV, V og VI til altjóða konventiónina um fyribyrgjan av dálking frá skipum (MARPOL 73/78) við seinni broytinum og tilhoyrandi protokoll frá 1997. 

At ásetingar eru skrivaðar í „kursiv“ merkir, at teksturin víkir frá omanfyri nevndu rættarkeldum. Talan kann verða um supplerandi ella samsvarandi trygdarkrøv, undantøk veitt sambært artikul 7 í EU-direktivi 98/18/EF, ella danskar vegleiðingar, sum greiða nærri frá serligum donskum viðurskiftum, ella einari danskari tulking av reglum, sum flaggstaturin hevur heimild at tulka.

Tílíkur kursiv-tekstur skal í hesum regluverki lesast við atliti til føroysk viðurskifti.

Eitt „R“ aftaná yvirskriftina til kapitlarnar II-1, II-2 og III vísir til samsvarandi ásetingina í SOLAS 1974.    

 

Aðrar reglur

Mint verður á, at umframt tað í hesi Fráboðan lýsta regluverkið fyri ferðamannaskip í innanoyggja sigling (sjálv Fráboðanin frá Skipaeftirlitinum D og tilhoyrandi fylgiskjølini við teknisku krøvunum), so finnast eisini aðrar reglur fyri ferðamannaskip í innanoyggja sigling í Føroyum, sum longu frammanundan eru galdandi í Føroyum, ella sum í framtíðini kunnu verða settar í gildi í Føroyum:

• Framvegis galdandi danskar „Bekendtgørelse“, lýstar í Kunngerðablaðnum B áðrenn Skipaeftirlitið varð yvirtikið 1. januar 2002 (sí logir.fo)
• Tekniskar forskriftir frá Søfartsstyrelsen („FSK“), lýstar í serliga danska tekniska kunngerðasavninum „Meddelelser fra Søfartstyrelsen“
• Vegleiðingar av ymiskum slag („VEJ“), somuleiðis lýstar í „Meddelelser frá Søfartsstyrelsen“
• Føroyskar „kunngerðir“, lýstar við heimild í løgtingslóg nr. 165 frá 21. december 2001 um trygd á sjónum (sí logir.fo)
• „Fráboðanir frá Skipaeftirlitinum“, somuleiðis lýstar við heimild í løgtingslóg nr. 165 frá 21. december 2001 um trygd á sjónum og kunngjørdar á elektróniska reglu-portalinum hjá Skipaeftirlitinum á www.fma.fo

 

Regluportalurin

Hendan Fráboðanin frá Skipaeftirlitinum D, íroknað fylgiskjølini við teknisku krøvunum, verður einans lýst elektróniskt á regluportalinum hjá Skipaeftirlitinum á heimasíðuni www.fma.fo, har eitt yvirlit eisini verður gjørt yvir samlaðu galdandi lóggávuna fyri ferðamannskip í innanoyggja sigling í Føroyum.